Kategoriyan hilbijêre;

Tenê yên kurdî?:

Pêşîn yên:

Agahî: dema 2 an jî zêdetir kategorî hatin hilbijartin, bila mijar wan hemû kategoriyênku te bijartine, bihewîne an hema tenê yek ji wan kategoriyan bihewîne jî bes e?
Hemû an hema kîjan be:


    3 mijar û 3 peyam
    helbestên bro omerî - tirşik
    helbestên bro omerî
    (7) (0) ecêb (0) (4)
    di mijarê de bigere

    1. (bnr: keça perî)



    Keça perî

            Wa da derî

                  Hiş çû j’serî

                         Wexta seher,



            Mijank xişt in

                  Dil dikuştin

                         Awirxencer.

                

    Zarşîrînê

            Nazenînê  

                  Xebxebşînê

                         L’ber hêlînê

     

    Meşkevokê

            Li ser dikê

                  Şev û rokê

                         Mame li ber

              

    Wey nazikê

            Pir xweşikê

                  Awir rikê

                         Dil qul dike

      

    Digeriya

            Li her ciya                

                  Keçperiya

                         Bi bask û per.

             

    Gula zinar

            Derket ji xar

                  Min nû dît yar

                         Bi tac û dar. 



    Lêvên şîrîn

            Bûm har û dîn

                  Kirim bê vîn

                         Işqa  dîlber.

             

    Çav kil dida

            Perde hilda

                  Heyv li çarda 

                         Şev ronî da

     

    Çavxezalê

            Camzelalê

                  B’ava xemrê

                         Hiş bir ji ser.

            

    Por li ser mil

            Kezî bi gul

    Bisk û  qişt in

                         Dil bûye kul

     

    Keça ciwan

            Lêv erxewan

                  Ji gewheran

                         Taca li ser.



    Pora tarî

            Gulav barî

                 Bro Omerî

                         B’ah û zarî



    Bû bilbilê

            Wê sorgulê

                 Rih spî kir lê

                         Wechê xwe zer.



    bro omerî



    2015.07.10-00:41 | xendekî

    2. (bnr: konê serxwebûnê)



    Derdê me kûr e, barê me giran

    Me hildaye ser sitû û milan

    Li her çar perça dengê me kurdan

    Gazî û hawar, axîn û. Fîxan



    Xweşmêrên gernas ketine cengê

    Xwînê dirjînin bi top, tifengê

    Li Cûdî,.Gabar… Di her astengê  

    Li ber xwe didin bi qîr û halan.



    Bi nivişt û xişt, bi serjenîşan

    Bi bertîlên pirr û bi bexşîşan

    Ji eniya me naçe ev nîşan

    Wekî Mazlûm got “Jîn e berxwedan.”



    Berxwedan xweş e ji bo azadî   

    Di nav gelan de bi şad û merdî              

    Serê xwe rakim, bêşerm û fedî

    Ji ser me diçe dîlî û talan.

                                              .                                      

    Rabim bigerim li vê gerdûnê...

    Konekî vegrim, bi xwêdan, xûnê,    

    Konê azadî, yê serxwebûnê...

    Da li bin bigrin govend û dîlan.



    Govenda roja  cejna azadî

    Kevokan berdim, kevokên sipî

    Da bidin gelan mizgîna aştî

    Li welatên din, digel Kurdistan.



    bro omerî



    2015.07.10-00:45 | xendekî

    3. (bnr: yar çû gerê)



    Ordeka Şaxa Cizîrê

    Devliken û awirtîrê

    Mijangxişt û ebrûkevan

    Heftê hûrî dikim qurban.

    Biskên xelek, guliyên zer

    Lê reşandin misk û amber

    Mahîrûyê, bi xalên qer

    Çavên belek, burhên li ser

    Kirim pîrê derd û keser...



    Li spîdê çû geşt û gerê

    Ne îro dê sib vegerê

    Ew dîlbera dil didaxê

    Çû nav bexçê gul û baxê...

    Li nav bax û li perê çem

    Wek her caran, wekî herdem

    Bi saz û ney dikir semah

    Olan dida Wan û Kemah...

    Pêsîr, derzî, toq û benî...

    Li ser sîngê pev dikenî.

    Lê min nedît, wilo gotin

    Dil û cergê min disotin...



    Li ber riya wê’y  vegerê

    Mame benda, her çav li rê

    Ya reb xwedo! Wê kengî bê

    Karxezala Çal û Şêbê.



    Dema hat di min buhurî                                   

    Dil ji min bir, hiş ji serî

    Çavên di reş, pora zerî...

    Sed caran kuşt Bro Omerî.



    bro omerî



    2015.07.10-00:48 [guhertin:2015.07.10 00:54]| xendekî

    4. (bnr: berfîn)



                             Niha                     

                          Têgiham 

                        Çima   wilo 

                   Serhildêr in Berfîn

                             Wan

                            Ji   te

             Dilop bi dilop

                  Wergirtiye  sorexwîn



    bro omerî



    2015.07.10-00:51 [guhertin:2015.07.10 00:55]| xendekî

    5. (bnr: gul)



    Her kesî gula di destê xwe de kiriye gulav...

    A min bi tenê li dest min maye çilmisî û xav.







    (bnr: azadî)



    Qet jê netirsin! ji dest naçin; ol û bawerî yên we ne...

    Bo azadiyê têbikoşin; hêj ku derfetên we hene.



    bro omerî



    2015.07.10-00:54 | xendekî

    6. (bnr: serencama pisîkê)



    Pisîkê taxek feqîr     

    Carek diçe mala Mîr

                                      

           Li nav baxçe, ber birkê                                

           Rastî peykerê şêr tê                                     

     

    Bi baldarî lê nêrî                                          

    Jê tiştek neket serî                                   

     

           Çû ber mirêka hundir                                   

           Li xwe gerand çend awir                            

     

    Dît ku mîna peyeker e                                 

    Ji qalibê xwe der e...                                  

     

            Ji yê malê dipirse:                                        

      “Ewê wek min çi kes e?”

                              

    Got: Ew peykerê şêr e                               

    Pir bi hêz û xweş mêr e,                              

     

            Şahê ajalên kovî                                        

            Gur li nik dibin rovî...                                    

     

    Hakimê çol û çiyê                                      

    Ji fîl ta bi mûriyê                                        



            Li daristanê ajal                                          

            Bi giyan û can û mal                                    



    Hemî jê re leşker in                                    

    Bêyî wî tevnagerin.                                      

     

            Piştî van pesnê şêran                                   

            Ku pisîkê malê dan                                          



    Biryar girt ku bibe şêr                                    

    Rizgar bike jin û mêr;                                 

     

            Awir vedan wek piling                               

            Terî rakir, kire sing                                  

                                                                          

    Rabû çû warek nenas                                    

    Pesnê xwe da bêqeyas....                              

     

            Li her derê bû dengî           

    Bizava wî lehengî   



    Baz û piling yek bi yek

    Hatin balê bûne lek  

          

            Gişan hilda darê xwe

            Berê xwe dan warê xwe...

     

    Bi def, borî û bilûr

    Guran kire zûrezûr

           

            Gur û torîk çûn ser wan

            Şar û gund kirin wêran



    Bi guran re şer danîn

    Rabûn qira hev anîn

            

            Baz û pilingên leheng

            Dinya li gur kirin ten



    Gur ketin bextê rovî

    Ku hinek bibe hêvî.

            

            Ew roviyê pir fenek

            Geh bi xap û geh bi dek

     

    Berê xwe da şoreşê

    Bi zikişkê, bi meşe

            

            Xwe gihande serleşker

            Dît ku pisîkek çavzer...

     

    Pisîk bazda kadînê

    Geh jî kete kulînê...

           

             Rovî ew girt û anî

             Li destê guran danî.

     

    Ji ber kirinên mekruh

    Ahd da, kir toba nesûh

             

             Nema tiştek wiha kir

             Giyanê xwe riha kir...

     

    Rast e, beza kitikê

    Ji axo ta sifikê...

              

              Ev çi hêviya bêxêr!..

              Çawa pisîk bibe şêr?



    bro omerî



    2015.07.10-01:00 | xendekî

    7. (bnr: rojên tarî)



    Mijê girt ser welatê min, ka heyv û ro, ka asîman

    Ket ser şar û kelehên min, tîr tê’r naçe mijek giran,

    Avsipî bi çavan de hat, rê û rêçik tev winda ne

    Li berya min aso dûr e, bergeha min bûye leylan...

     

              Derdan heland hinav û dil, diaxivin kul û birîn

              Janê daye dilê bi kul, ji ber daxan dikim qîrîn,

              Dikim hawar, gazî dikim li heval û li cîranan

              Ji birînan nêm bicok in, ji çavên min çemên bi xwîn...

     

    Gur bi hêrîş ket nav kerî, ne berx û mî û ne beran

    Gurê manco dest neda wan, bi zanebûn çû ser şivan;

    Ro hat girtin, roj tarî bû, can şewitîn bi ar û pêt

    Gel bêhêvî, li her derê haho hawar digel fîxan...



              Lê dayê li te nemayê, stranek şewat binehwirîn

              Tê de derd û kulên giran ‘jana dilan’ bihêwirîn;

              Bila kurd û dinya alem hayîdar bin, rabin ser xwe                             

             Tevbigerin, lêbipirsin, derman bikin cerh û birîn...



    bro omerî



    2015.07.10-01:03 | xendekî

    8. (bnr: dilo)



    Erê dilo, lo lo dilo!

    Agir kete sênca çilo...

    Dinya alem bûne dewlet

    Kurdistana min ma wilo...



           Dilo rabe bilezîne

           Bike hawar, biqîrîne

           Dinyayê pê bihesîne

           Kurdistanê bivejîne...

     

    Tewlo dilo, jarê dilo!

    Agir ketiye sorçilo...

    Dinya alem serbixwe ne...

    Kurdên gernas, mane wilo.

     

           Dilo rabe xwe bide hev

           Biryar bide bi dil û dev

           Karwan Xabûr li pişt xwe hişt

          Ro çû ava, li me bû şev...



    Erê  dilo, lo lo  dilo!

    Agir kete sênca çilo...

    Dinya alem bûne dewlet...

    Kurdistana min ma wilo...



           Dilo rabe, dilê leheng

           Bi tevahî û bi aheng

           Em bixwînin pirtûk, ferheng

           Bo felatê em bikin ceng...  



    Tew lo dilo, jarê dilo!

    Agir ketiye sorçilo...

    Dinya alem serbixwe ne...

    Kurdên gernas mane wilo...



           Dilo rabe! bi halê xwe

           Bike qîrîn li gelê xwe...

           Wekî şêran biçin çiyê

           Têbikoşin bi dilê xwe...



    Erê  dilo, lo lo  dilo!

    Agir kete sênca çilo...

    Dinya alem bûne dewlet...

    Kurdistana min ma wilo...

     

           Dilo çima tu rawestî

           Bê biryar û tu bê hest î...

           Ez helandim, mame hestî...

           Li qada şer, şûrşikestî.                      



    bro omerî



    2015.07.10-01:07 | xendekî

    9. (bnr: peyman ji yarê)



    Bi  şalê kesk û sor û zer

    Bi pêlaven bendik li ser

    Dame ber sed tîr û xercer

    Deh li dil da, not li ceger.



              Ji kulîlkan taca wê ye.



    Ji sazê hat, westa û mest

    Lê rast hatim wa dest bi dest

    Min maçek ji lêvên wê xwest

    Got: “Ma bi çi maf û mebest? ”



             Min got: “Ew jî baca rê ye.”

     

    Bi taca kesk, sor û zerî

    Zarşîrînê keça perî

    Şeng û şox û eşqperwerî

    Li Amedê, li Agirî...



              Ji zîv û zêr, birca wê ye.                           



    Keça ciwan, lêv erxewan

    Şalê rengîn li nav milan

    Kase kef de, hate eywan

                  Tîr avêt dil

    Dil disotin bi awiran

     

              Şiva xosê bejna wê ye.

     

    Li ber masê şox rûdinişt

    Mey dinoşî, qedeh dimijt

    Lêv li camê şopek dihişt

    Min cî girt li masa tenişt



             Çavên min her li fercê  ye.



    Bi nazî  li min zîvirî

    Kenî, got: “Ey Bro Omerî!

    Wele jêkin dest û serî

    Ji te pê ve, kes ne yarî.”



             Ev; peyman û merca wê ye.



    bro omerî



    2015.07.10-01:21 | xendekî

    10. Xora ez helbesta ey ra zaf çîyêk fam nêkena cunkî kurmancîyê mi ê tewr weș nîyo. La yew albumêk esto : pêșkarê. Zaf weș o. Mi xelêk goștarî kerd. Album de muzîyenê ma yê namdar șiîranê bro omerî bi șeklo kilam vatênê. Şima hemûna goștarî nêkerd? Lez tewbe biwazîn.



    2015.07.10-01:56 | ladyzazarus

    11. (bnr: dÎlgİrtİna mİlÎtanekÊ)



    Li Nisêbîna hemdem û rengîn

    Payiza paşî dar û gul xemgîn.



    Danê esirê pirî tengijîm

    Bo hilmek azad, pê dilxweş bijîm



    Derketim nava baxçên Girnewas

    Ji kul û derdan bibime xelas...



    Warekî pir xweş tev baxçe û dar

    Ne kaşekî hov, newal û zinar...



    Ji sal heta sal bihar û her dem

    Her alî hêşîn wek Baxên Îrem.



    Bi meşek hêdî, gavên pir giran

    Ketim nav pêlên derya gûmanan...



    Şalûl û bilbil, kewên xebxebşîn

    Ser serê min re azad difirîn.



    Ez wilo şad û ji xwe bi bawer

    Wextekê bijîm bêderd û keser.



    Kêf û şadiya me kurdên bindest

    Dadigere şîn, xemê demildest...



    Gurên devbixwîn, har û bêperwa

    Nêçîr dikirin li erd û hewa



    Berê xwe dane riya Midyadê

    Xezalek rabû ji nava qadê...



    Yeke pir xweşik, bi nav û nîşan

    Hêviya kurd û kara niştîman...



    Destvala, bêçek li vê dinyayê

    Şêrê Elî be tu deng jê nayê.



    Dane ser piştê bi “ewtîn, zûrîn”

    Ji dev û qîlan dinisilî xwîn...



    Bêmefer kete destê nemerdan

    Ji wê rojê ve bûm pîrê derdan.



    Bizav çênebû ji mêr û merdan

    Li taxan dengê dahol û dîlan...



    Gelo ev kurdên tevizî û xav

    Ta kengî bijîn bêtac û nasnav?.



    2015.08.08-00:16 | mergehez

    12. (bnr: ez û tîtî)



    Welat li bin piyê neyar

    Miçiqîn co, kanî, cobar..

    Kavil kirin gund û cîwar

    Sotin giya, devî û dar...



    Zivistan bû, rojek pir xweş

    Ez û Kenzan bi dilê geş

    Derketin nêçîre bimeş

    Min dît du teyr ên di çavreş...



    Yek jê baz bû, ne cî û mal

    Tîtî bi me re bû heval...

    Ne marmarok û ne kevjal;

    Welatek bê dar û ajal...



    Derketin ji Nisêbînê

    Min dît bazek li kemînê

    Geh radibe, geh datînê...

    Berê xwe da Cibiltînê...



    Em çûn qeraçê Zorava

    Li hevraz û li ber ava

    Ne mirov, ne gundek ava...

    Ku li wan bikin silava.



    Omerî

    Lo tîtiyo! Li vî warî

    Çima wisa tu dizarî?

    Ma kanî ew qewmê Arî

    Bi ku ve çû; kîjan warî?



    Tîtî

    Law û nevî yên di Medan

    Welat terk kir, zevi berdan ..

    Ez û xiltekî kor lê man

    Bûne hêvî; bûn notirvan...



    Omerî

    Kanî şalûl, kanî bilbil?.

    Keyf û evîn dixistin dil...

    Kanî reyhan; kanî simbil?..

    Kanîn qitik ên çavbikil?..



    Tîtî

    Mame ez û xiltê nebez

    Geh li hevraz, geh li nav rez. ..

    Em kar dikin bilez û bez

    Li Zorava û li Kepez...



    Welatekî bêmecal e

    Warê Egît; warê Zal e...

    Xwedî îro ne li mal e;

    Xilt cot dike; ez jî pale...



    Kenzan

    Ji tîtî re got, “ezbenî!

    Ezman zelal, ro dikenî...

    Vaye baz, ma nêçîr kanî?..

    Ew çemên coş, mêrg û kanî...”



    Tîtî

    Li vî warî û li çiya

    Ne dar şîn hat û ne giya...

    Bêkes maye warên Medya

    Xilt cotyar e; ez jî keya...



    Kenzan

    Bi dengekî kelogirî:

    Hey wax keko! Bro Omerî

    Xeynî tîtî, xiltê gurî

    Kes nemaye li vî warî...



    Kan î cotyar, kanî gundî?..

    Vaye mezel, kanî zindî?..

    Vane zevî, kanî xwedî?..

    Xeynî tîtî yê bêfedî...



    Tîtî

    Kenzan! ka em werin ba hev

    Biryar bidin bi dil û dev

    Em kar bikin bi roj û şev...

    Bikin warek aram, lihev...



    Bi tevahî, bi kêferat

    Bi dil û can bikin xebat...

    Ava bikin gund û binyat

    Jiyanek nû bidin Welat...



    2015.08.08-00:19 | mergehez

    13. (bnr: evîndar im)

    Ji derdê evîna yarê

    Perîşan im, min sed eman

    Ji beyanî ta êvarê

    Şaş û gêj û wek serseman,



    Wek sersem û wek sewsiya

    Digerim li çol û çiya

    Goştê canê min heliya

    Şiyan û qidûm jî neman. .



    Ev ar ê taya evîn e

    Nefes li min diçikîne

    Min ne mecal, ne hekîm e

    Manendê êşa bêderman.



    Dil bi birîn û mûmar e

    Xedeng li destê nojdar e

    Ji ber daxan min hawar e

    Qîrek li erd, yek li ezman.



    Evîndar im, ez ne dîn im

    Di eşqê de Mem û Zîn im

    Dil pare û bi birîn im

    Ji dil diçe pêt û dixan.



    Heta ku ez te nebînim

    Maçek ji lêvan nestînim

    Pê sedsalan neqedînim

    Qet namirim û esselam.



    Keçê were ser vî mirî

    Goştê ji hestî feşkilî

    Carek dest deyn ser vî dilî

    Ku lêde manendê keman.



    Keçê were min bibîne

    Derê mizgeftê danîne

    Mirî me, tu bivejîne

    Weke Îsa, lê be selam.



    Bila em her du zînde bin

    Dil de gul û kulîlk vebin

    Bi mirinê cuda nebin

    Mîna Mem û Zîna Zêdan.



    Keçê ji bircê were der

    Seryek bide dilê b'keser

    Lê ba bijen bi pora qer

    Ji bîr bikim kul û derdan.



    Ka em biçin bexçê gula

    Rizgar bin ji derd û kula

    Zend li bin seryan bin bila

    Doşek erd be, lihêf ezman.



    Ka em herin Omeriya

    Li nav bax û hûrdeviya

    Tu bibî diya sebiya

    Ew çax mirin li ser çavan.



    Gelek wek min evîndar in

    Bêderfet û ne li kar in

    Hin ji wan jî li sêdar in

    Wek ev car û wek her deman;



    Evîndarê çavên belek

    Pora tarî, biskên xelek

    Bro Omerî wisa gelek

    Dil şa dike bi xeyalan.



    2015.08.08-00:22 | mergehez

    14. (bnr: her warek bi bilbilek)



    Her bilbilek bi gulek

    Her bilbilek bi dilek

    Bilbilê Kurdistanê

    Yekî bêper û kulek



    Her warek bi bilbilek

    Her bilbilek bi gulek...



    Xem nîn e, ew bilbil e

    Evîndarê sorgul e

    Bêper û bêperwaz e

    Dilê wî jî bi kul e



    Her warek bi bilbilek

    Her bilbilek bi dilek...



    Gula wî yeke sor e

    Sed dirî li derdor e

    Bo çi bijart gula han?

    Bidestxistin pir zor e.



    Her warek bi bilbilek

    Her bilbilek bi gulek...



    Her çiqas sitemkaran

    Bi tundî û bi daran

    Çîm û perwaz şikandin

    Lê, gul neda neyaran



    Her warek bi bilbilek

    Her bilbilek bi dilek...



    Te awazek nerm heye

    Bo gulê qedîfe ye

    Rabe hûrik bilorîn

    Bo dijmin pir qebe ye



    Her warek bi bilbilek

    Her bilbilek bi gulek...



    Bilbilê hêla Botan

    Îro li te zivistan

    Wê bihara te jî bê

    War dê bibe gulîstan.



    Her warek bi bilbilek

    Her bilbilek bi dilek...



    Bilbilê Warê Boşo

    Li te dijminqidoşo

    Gulîstan lewitandin

    Divê tu paqij bişo



    Her warek bi bilbilek

    Her bilbilek bi gulek...



    Bilbil! Tu jar û mestî

    Bo gulê bûyî hestî

    Bi derdê te dikele

    Dê çi ke, ew bindestî.



    Her warek bi bilbilek

    Her bilbilek bi dilek...



    Bilbilê lata gelî

    Bigrî digel Omerî

    Gulîtan şewitandin

    Tev bû rijî û xwelî



    Her warek bi bilbilek

    Her bilbilek bi gulek...



    Bilbilê Kevrê Biqul,

    Serhed û warê kavil...

    Bes bixwîne bi kovan

    Te heland hinav û dil.



    Her warek bi bilbilek

    Her bilbilek bi dilek...



    Hooo! Bilbil, lo bilbilo!

    Perşikestî, dilbikulo

    Bihar bi ser te de hat

    Rabe bixwîn ji dilo.



    Her warek bi bilbilek

    Her bilbilek bi gulek...



    Bilbilê Şax û Şêbê

    Vê bihara ku wê bê

    Gul, kulîlk devliken bin

    Gulîstana ku lê bê



    Her warek bi bilbilek .

    Her bilbilek bi gulek

    Bilbilê Kurdistanê

    Yekî bêper û kulek.



    2015.08.08-00:24 | mergehez

    15. (bnr: gur û rovî)

    Bro Omerî di pirtûka xwe de dibêje "min vê helbestê li rojnameya welat de dît. Lê dirbê helbestê pê nediket aheng , wezin û pîvan tê de tunebû. Ez li ser vê helbestê du meh şixulim dibê bê zanîn ku min ew vejand lê vê helbestê jî ez vejandim. Ger xwediyê vê helbestê kî be ez spasiyên xwe pêşkêşî wê/wî dikim. "





    -Gur û rovî-

    Gur û rovî bûn heval. Bi dil , can , giyan û mal.

    Pir bi hev du şêrîn bûn. Her du bi hev evîn bûn.

    Dane hev du bext û soz. Pê bûbûn xudan yek doz.

    Keftar cîranê wan bû. Bi her sê yek eywan bû.

    Dest , mil û hêz dane hev. Kar dikirin roj û şev.

    Roviyê pîs , hîlekar. Gur şandibû ba keftar.

    Got : "xwestina me ev e , ji eywanê derkeve "

    Keftar got : Pismamê gur , diranên te wek bivir.

    Keko rî dibe bihost , tu car dijmin nabe dost.

    Tu meki bi ya rovî , ji xwe ew ne mirovî.

    Em hêza xwe bikin yek. Hember roviyê fenek.

    Bikin cehd û kêferat , rizgar kin war û welat.

    Li wî welatê hêşîn , jiyanek azad bijîn.

    Gurê serhişkê nezan , dirêj bû çoyê eywan.

    Wî bi keftar re şer kir , ser li ser keftar perçe kir.

    Rovî ji paş ve lêxist , keftar ser dev erdê xist.

    Keftar çû mal nexweş ket. Ji kerban re bêheş ket.

    Wê gav pey wî dane dar , bû wek bendekî stuxwar.

    Malê xwe hemî firot ji xanî heta bi bot.

    Jê re ma bû yek baxçe bihayê wî bîst akçe.

    Rovî da bû gur pere got ji me re bikire.

    Bi keftar pir zor hat rabû kir terka welat.

    Gur û rovî bûn ortax , baxçe kirin gul û bax.

    Gur xebitî bi rastî , rih û canê xwe xwestî.

    Roviyê bêbext û soz xirabî xwe re kir doz.

    " Gur ne ji qewmê me ye gazin ji me tuneye.

    Ya baş ji me re ev e ew ji nav me derkeve "

    Çavên wî tê nebirî tiştek jî neket serî.

    Got : Bi min tenê nabe. Divê hawar lê rabe. Geriya li ser heval li pismam û ap û xal.

    " Em û hev yê hev du ne. Gurê şîn pişxwûn e

    Ger firsendê bibîne dê me ji vir derxîne.

    Tevdîra xwe bibînin wî ji nav xwe derxînin "

    Dan hev du soz û peyman gur derxînin ji eywan

    Rovî qasid şand pey gur got : bila bê heta vir.

    Gur hat guhê xwe da wan. Xweş nedît lebata wan.

    Silav da û sekinî rovî rabû pê kenî.

    Ji xwe rovî şervan e lê gur dabû wan nan û av e.

    Pirsek ji vir yek ji wir. Heta xwe lê kir gur.

    Got : "Serê te mezin e tiştek te li vir tune. "

    Gur got : " peyva ez dibêjim ji dil û can dirêj im.

    Qesem navê xwedê kim ez ê guhê te jê kim."

    Pir pir li zora gur çû. Got : nehatime recû.

    Rovî got :" tu feqîri , tu rençber î , ne mîr î. "

    Gur got : " baxçê yê me ye ferqa me qet tuneye. "

    Gerçî ez bêkes im ji qewmê te re bes im.

    Rovî got : "qet deyn neke apê te dê te qet bike "

    Gur got : "qewmê te çi ne ? Nizanim mêr an jin e ? "

    Rovî bang kir dergevan. Ap û xal hatin meydan...

    Rovî got : " qewmêm heye yê te kesek tuneye. "

    Gur di cî de sekinî rovî kis kis pê kenî.

    Rovî got gur : " Çawanî ? "

    Gur got : "Mîrêm tu zanî. "

    Rovî got : " Gur zalim e jê re şerde lazim e."

    Qewm got : " Gur bi dar veke. Rovî got " îcab nake

    Her qewmê wî sêdar e çibkim ew xebatkar e... "

    Rovî emrê apê kir. Guhê gurê şîn jê kir.

    Gur bi tenê ma li mal ne bav û kur , ap û xal .

    Gur kete bextê rovî rih berda xwe kir sofî.

    Rovî peza jê xwestî. Goşt xwar û da gur hestî.

    Gurê şîn-boz , pegranî. Qîma xwe bi vê anî.

    Gur kar kir bi mil û zend. Keda gurî rovî stend.

    Gur rabû çû zewicî para xwe kire du cî.

    Demek wisa derbas kir ta ku hestî xelas kir.

    Paşê zarokê wan bûn barên wan pir giran bûn.

    Zarokên wan mezin bûn tev mêr kur û jin bûn.

    Gur zêde bûn. Bûne pir. Hestî têrî wan nedikir.

    Bo hestiyan şer danîn. Rabûn qira hev anîn.

    Dûv re tev de bûne yek civîn danîn lek bi lek.

    Kaxizek nivîsandin ji roviyan re şandin.

    " Hestî pirî hindik in. Ser û pî ihsan bikin. "

    Dane destê dergevan wî jî da rêveberan.

    Daxwaziya wan ji me " ser û pî jî bidin me."

    Rovî li textê jor bû. Çav li nav serî sor bû.

    " Îro xwestin seriye sibê dora hemiyê.

    Nîjada min çêtir e. Hestî ji wan re pir e.

    Bikin înad û bazar dê biçin riya keftar.

    Bê serok û rêxistin guran li rovî xistin.

    Rovî bi fen pere gur kirin pare pare.

    Hinek ji wan kirin mît hinek ji wan jî egît.

    Yekitiya wan şikest tev de bûn dîl û bindest.

    Wisa ku gur nebin yek. Bê rê û bê seriyek.

    Hember roviyê fenek rezîl dibin yek bi yek...



    2016.08.13-19:03 [guhertin:2016.08.13 19:10]| biaqila malê

    16. (bnr: rewşa welêt)

    Di nav ar û pêt de dijîm

    Hevala min tu çawayî ?

    Bi kul û derdên xwe digrîm

    Delala min tu çawayî ?



    Hezar sal in li ser te ceng

    Hatin kuştin mêrxas , leheng

    Cejn û newroz diçin bêdeng

    Sersala min tu çawayî ?



    Ew şêr û baz in li çolê

    Li Serhedê û li torê

    Sed seg berdane derdorê

    Şepala min tu çawayî ?



    Şepala li lata gelî

    Birîndar e , kur dinalî

    Se direyin li her alî

    Hewara min tu çawayî ?



    Dagirkerên barbar û hov

    Binpê kirin mafên mirov

    Rûxandin tev çewlîk û gov

    Pergala min tu çawayî ?



    Şar û gund giş wêran kirin

    Jiyan li me zîndan kirin

    Der û hundir talan kirin

    Bermala min tu çawayî ?



    Li pêş çavên Bro Omerî

    Agir berdan rêl û devî

    Teba , tilûr revî revî...

    Xezala min tu çawayî ?



    Roja ku ez te nabînim

    Hêsrên çavan dibarînim

    Bi qerpalan dimalînim

    Desmala min tu çawayî ?



    Xwezî b'roja te bikim bûk

    Hine bikin dest û neynûk

    Bigerînim li şar û sûk

    Bêmala min tu çawayî ?



    2016.08.25-21:29 | biaqila malê

    dengdanên dawîn (Yên Din..)
    kurdiya akademîk [3]
    Hal û hikayata kurdiya akademik hema bi temamî wer e:

    A: Navê...
    endazer [3]
    (bnr: tülay tu bi xwedê kî vegerî tülay) (vbnr: tülay ne olur geri dön...
    gulêê [1]
    YouTubera gelekî acemî * her çiqas meseleya xwe îfşakirinê gelek cara...
    gîska gerok [1]
    gotina ku diya min a dilzîz her tim ji bo min dibêje. Di destpêkê de...
    tûtû [1]
    Ango tutû. Xwarinek e. Cûreyek şorbeyan e. Bi dan û (v...
    belki ev jî bala te bikişînin
    » helbestên nebez goran
    » bromance

    Kategoriyên mijarê:: kurdukurdi weje wejehlbst niviskarhlbstvn
    nivîskarên ku li vê mijarê nivîsîne


    sitemap
    reklamokên beredayî