1. Gundekî li geliyê Kêsanê ser bi navçeya Tetwanê ya girêdayî Bedlîsê ye. Wek gundên din ên li devera Kêsanê, Çangês jî çar dora wî bi çiyan pêçayî ye. Çiyayên gund serê wan asê û bilind û çetin in. Gundî piranî bi xudankirina pez debara xwe dikin. Li gund hem li hêla rojava, hem li hêla başûr, hem jî li hêla rojhilat ve çemên ji zozanan diherikin. Sê mezrayên Çangêsê hene. Mezrayên wî Kiriyaç, Bablesûr û Tûk in. Gund dikeve navbera sêgoşeya zozanên Sînegir, Rastan û Karêzê. Di sala 1994 de ev gundê nêzikî pênsed malbatî ji ber şerên di navbera PKKê û dewleta tirk de ji alî dewletê ve tê valakirin û şewitandin. Di sala 2002 de bi pirojeya hikûmeta Tirkiyê a bi navê "vegera gundan" destûr tê dayîn ku gundî ji nû ve vegerin gundê xwe. Erda çangêsê tev bi dar û berin. Çiyayên Çangêsê tev bi darên mazî, berû û sipîndar in. Zivistana gund bi berf û havîna gund jî hênik e. Li demsalên biharan li gund pincarên wek sîrik, xîtik, gulik, rêvas û gelek cûreyên din ên pincaran şîn dibin. Gundîyên Çangêsê bi piranî li metropolên Tirkiyê li bajarên weke Edene, Mersîn û Stenbolê belav bûne. Niha li gund nêzikî pêncî malbat dijîn û kêfa wan li cî ye.