markisîme , dixwazim ,
li her derî dibazim ,
kûbîme – serfirazim ,
berî her tiştî kurd im .

sofiyatim bîrewer ,
emrîkîme divêm şer ,
asyewîme bi tevger ,
berî her tiştî kurd im .

li efrîqa dikim şer ,
li ewrûpa dikim ger ,
ez mirovim li her der ,
berî her tiştî kurd im .

viyetnama gernasim ,
hindîme bê kirasim ,
ez birçîme pê-xwasim ,
berî her tiştî kurd im .

gernasim , mil ji pola ,
nema dibim , ez kola ,
diçim şerê engola ,
berî her tiştî kurd im .

dijminê koledarim ,
ne razame , şiyar im ,
bi dijmin ez dikarim ,
berî her tiştî kurd im .

ez dijminê kevnarim ,
jêhatîme , dijwarim ,
ez mirovim , ne harim ,
berî her tiştî kurdim .

ez karkerim dest qerêj ,
dêwê reşim , çîm dirêj ,
serê dijmin dikim gêj ,
berî her tiştî kurdim .

ez cotarim diçim cot ,
bi dest min tim dar û rot ,
pî çirî û serî qot ,
berî her tiştî kurdim .

heçî axa , heçî şêx ,
bigre darê xwe , tim lêx ,
serê dijmin bipelêx ,
berî her tiştî kurdim .

qada mine , bê cîme ,
dexla mine , birçîme ,
ez sofîme , heccîme ,
berî her tiştî kurdim .

petrol diçî destê kê ,
çi hiltênim , didim gê ,
kara min çû di ber bê ,
berî her tiştî kurdim .

hetta ku em nebin yek ,
dest navêjin dar û çek ,
emê bijîn wek parsek ,
berî her tiştî kurdim .

divêt , ko em şiyar bin ,
ji cengê re li kar bin ,
tim dijminê neyar bin ,
berî her tiştî kurdim .

navêm kevneperestî ,
ez dixwazim serbestî ,
ma kî divê bindestî
berî her tiştî kurdim .

divêm bigrim ez welat ,
ez dizanim , ko felat ,
dostaniya sofiyat ,
berî her tiştî kurdim .

ev destûra kevnare ,
tev qerêj û gemare ,
wê em hiştin ji pare ,
berî her tiştî kurdim .

hetta karker û cotkar ,
bîrewer û xwendekar,
hemî nebin em şiyar ,
berî her tiştî kurdim .

em nikarin herin pêş ,
kes nadî me dora êş ,
wê me bixun gur û mêş ,
berî her tiştî kurdim .

qata jor û qata jêr ,
dest qelêr û xwedî zêr ,
zikê birçî , zikê têr ,
berî her tiştî kurdim .

îro bûye dubendî ,
"beg û axa " û " gundî " ,
em nabin yek bi rindî ,
berî her tiştî kurdim .

gerek bibin : partîzan ,
benda reben-pir xizan ,
em rê nedin van dizan ,
berî her tiştî kurdim .

ka li kûye berê me ?
kî bûne rêberê me ?
ka çi hate serê me ?
berî her tiştî kurdim .

bixin destên xwe hevsar ,
xwedî dewlet , xwedî dar ,
yefşê nedin koledar ,
berî her tiştî kurdim .

lê ez kurdim markisî ,
kara xwe nadim kesî ,
naxum nanê bi tisî ,
berî her tiştî kurdim .

ez kurdekî dilbirîn ,
li nav dînan bûme dîn ,
hetta ciger me kir xwîn ,
berî her tiştî kurdim.