1234. bersiv bo tirşikvan dilreş:

ti têkilîya kî û kê bi nêr û mê bûnê, ango bi zayendan tuneye; herdu jî karin ji bo herdu zayendan werin gotin. Ji xwe ew cînavkên pirsê yên kesan in, ji bo kesan tên bikaranîn. Kes nayên naskirin, ji lew re bi cînavkeke pirsê lêpirsîn çêdibe.

kê rewşa tewandî ya kî ye. Çawa ku min/te/wî/wê/me/we/wan rewşa tewandî ya ez/tu/ew/em/hûn/ew e, her wiha kê jî rewşa tewandî ya kî ye. Heta ku ev têkilî neyê dîtin, ev mijar nayê zelalkirin. mînak:

Dengê Dîlberê pir xweş e. Dengê wê pir xweş e. Dengê kê pir xweş e?

Binêr wê û Dîlberê li wir tewandî ne, ji lew re divê cînavka pirsê tewandî be, ango ne kî, lê kê were gotin. Çawa ku meriv nikare bi mebesta Dîlberê (wê) bibêje ew, her wisa meriv nikare di pirsê de jî bibêje kî. Meriv kare bibêje, lê ji hêla rêzimanê ve çewt û nexweş e.

mînaka dawî:

Kê kî kuşt?
Wê ew kuşt.

çavkanî: Here lînkê

(bnr: bikaranîna kî û kê)