11. Kirrîna malê bi her awayî avantaj e û karekî pirt maqûl e, tabê derfetên meriv hebe.
Carinan li tvyê temaşe dikim, camêr dibêje ez ji mamostetiyê teqawît bûme, di mehê em bêjin 4 hezar mehaneya emekdariyê distînim lê du hezar jê didim kirê felan. Yan jî ez dibînim jin û mêr bi hev re dixebitin karmend in hinekî romantîk tevdigerin û di ciwaniya xwe de ji dêla ku cara pêşî melekê ji xwe re bistînin bi pereyên xwe digerin, piştî sî çil salan teqawît dibin, mehaneya wan kêm dibe û nikarin heqê kirê bidin.
Bila kes şaş fêm neke ez nabêjim malhez bin an bibin koleyên mal û milkê lê bes rasyonelbûn her gav maqûltir e. Û kirrîna malê jî ne asteng e li ber ger û geşt û kêfê.
Ger meriv hinkî hesab û Kîtab zanibe dê baş fêm bike ku dema meriv bibe xwedan malekê, rehettir kare kêf û seyranê bike. Matematîk û îstatîstîk derew nake.

Faiz ne ewqasî girîng e. Mesela krediya min 180 hezar bû û bi heft salan ezê di mehê de teqrîben 3100 bidim bankayê. Teqrîben 2150 hezar deynê min e 950 TL jî faiza wê ye. Wek ku zêde be xuya dike lê ne wisa ye
Ya yekem: jixwe min wê demê mal nekirrîbûya jî 900 TL heqê kirê bidaya, her sal jî heqê kirê zêde dibe. Sala ewil heqê min ê kirê bi qasî faîzê bû lê aniha heqê kirê ji krediya min jî zêdetir e.
Ya duyem: bi berhevkirinê meriv nikare heqê malekê berhev bike. Em bêjin ku min mal negirt li dewsa wê min bi qasî heqê kredî pere berhev kir. mesela em bihesibînin 84*3100 dike 260.400 Yanî bi qasî heqê kredîyê min pere berhev bikira jî dikir 260.400 tevî ne heft sal pênc sal jê derbas bûye aniha buhaya mala min bi qasî 800.000-850.000 falan e. Ez bawer im piştî du salan dê bibe herî kêm Mîlyonek. Yanî bi vê hesabê basît jî kêmtir 740.000 pere peyda bikim divê * tabî heft salan min ê heqê kirê jî bida û heqê kirê ji heqê kredîyê dê zêdetir derketa. Ew jî zirareke din e. Jixwe min hîç behsa wê nekir jî.

Kesên ku rewşa wan heye ku bi kredîyê malekê bikirrin bê guman jidil dibêjim hîç jê texsîr nekin û netirsin rojekê jî dereng nemînin û herin bistînin. Her roj ji roja buhurî dijwartir dibe. Piştî bi salan deyn diqete û hûn jî belaya kireyê jî xelas dibim. Rehetîya herî mezin ev e li dinyayê...
Bavê min ê rehmetî piştî ku di sala 1961 de dizewice ji malê cihê dibe lê ji xwe re mal nastîne. Ji 1961an heya sala 2018an di kirê de bû. Belkî di 57 salan de bîst mal guherandibû, tê bîra min her meha ku diçû mehaneya xwe ya ji teqawîtîya bağ-kurê ji bankayê dikişand cara ewil heqê kirê jê derdixist û tim nifiran dikir û digot di ciwaniya xwe de min karîbû sê çar heb mal bikirîya lê qismet nebû, xwezî min deh mal bikirîya.
Her gav xwedan malê ku em têde kirêdar bûn, ji ser poza xwe li me dinêrîya, min bîst û şeş salan nefret kir ji kirêdariyê ji loma çawa ez zewicîm min ji xwe re mal stend.