56. Stranbêjekî navdar û gellekî jêhatî yê mûzîka kurdî ye. Bi mûzîka xwe ve bandoreke mezin li ser nifşên Kurdan çêkiriye. Dema derdikeve li ser dikê bi şal û şapikê xwe yê kurdewar, bi tembûra xwe û bi coşa xwe hesteke netewî dike dilê xemxurên kurdî û Kurdistanê. kengî li rastê Qeydên konsertên wî yên kevn bêm, ji dengê wî û ji dilsoziya wî re dibim hijmetkar û kêfxweş dibim ku me stranbêjekî wiha heye.

Lê ji bilî van pesn û wesfên wî xwediyê kesayeteke pirr ecêb e. Ji berê de ye xwe kiriye aqilmendê kurdan. ji loma navê xwe jî kiriye "şivan". şivanê neteweke nezan û bindest. Bi wê mebestê di Gellek Stranên xwe de yan di daxûyaniyên xwe de carinan rexneyên xweş li civata xwe û li siyasetmedarên Kurdan dike. Pê re xwediyê qisûrekê ye ku bi salan e nayê dermankirin. nikare bi serê xwe azad û bê minet bijî. Hertim pişta xwe dide rêxistin an partiyeke Kurdan ên bi heft avan ji hev dûr. Pêdiviya wî tim bi heyraniyê heye, Ya rast pêdiviya hemû hunermendan bi vê mîratê heye lê ev li cem şivan perwer bûye wekî nexweşiyekê. Dibe ku naxwaze piştî evqas ked û tahbê bêyî jibîrkirin an qedrê wî neyê zanîn. Lê heta niha min guhê xwe dabe kîjan hevpeyvînên wî hema bêje di hemûyan de singê xwe fireh dike, pesnê zanîna xwe, hunera xwe û ya şexsê xwe dide. Û Ji bo bê hebandin, hejêkirin her gavê xwe dispêrîne aliyekî û aliyekî din ji xwe re dike dijmin an bi gotinên xwe yên ecêb dikeve nav rojeva Kurdan.

Heta vê hingê ew û alîgirên PKKê xwîniyê hev bûn, ava wan di cokî de nediçû lê bi demê re çi guherî nizanim Şivan Perwer Vê taliyê pesnê Öcalan dide, bi awayekî dilovanî qala wî dike. Medyaya PKKê jî wekî ku şivan xelat bikin Ev çendek e Wî derdixin li ser ekranên xwe. Kurdên alîgirên wan ên ku demekî gellekî heqaret li şivan perwer kiribûn, gef jê xwaribûn niha lê xwedî derdikevin, pesnê wî didin. lê ya ecêb vê carê jî aliyên din ji şivan re bûne dijmin. bi min halekî sosret e ev. Siyaseta Kurdan a bêhnpêketî û parçe parçe zextekê li ser hunera kurdî çêdike û hunermendan dike pêkenî. Heyf!