11. Her çiqas di derbarê avakirina bajarê Farqînê de hin texmîn û dîtin hebin jî, di rastiya xwe de baş nayê zanîn ku ev bajar kengî û ji aliyê kîjan qewmî ve hatiye avakirin. Li gor çavkaniyekê, Farqîn di dema asûriyan de hatiye avakirin û mîna Miferket an Mifirkert hatiye bi navkirin. Li gor efsaneyekê jî, bajar di dema urartuyan de ji aliyê Marusu Layuta ve hatiye avakirin. Îdîayeke din jî ku ev bajar ji aliyê dewleta Tîgran ve hatiye avakirin û yek ji bajarên herî mezin û girîng a dema helenîstîkî bûye û navê bajêr Kerta bûye. Dewleta Tîgran a ermeniyan beriya zayinê di sala 77'an de hatiye avakirin. Li gor Moltke jî, bajarê bi navê Tîgranokerta ku ji aliyê Tîgranê Mezin ve beriya zayinê di salên 80'yî de hatiye avakirin û Meyafarqîn heman bajar e. Ev bajarê bi navê Tîgranokerta cara yekem ji aliyê kumandarê romayî Lukulus (Lucullus) ve, paşê jî di dema kumandarê Neron, Korbulo (Corbulo, 7-67 p.z.) ve tê dagîrkirin û bajar heta dawiya sedsala VII an jî girîngiya xwe diparêze. Li gor dîrokzan Ibn el-Ezreqê Farqînî jî, piştî şerê navbera romî û sasaniyan (387 p.z.) pîskoposekî farqînî bi navê Mar Maruthan, bi destûra împeratorê Bîzansê û hukumdarê Îranê Yezdîgirt, şehîdên xiristiyan li vê herêmê vedişêre û bajarek li ser ava dike û navê Martyropolis (anku, Bajarê Şehîdan) lê dike. Bajar, di sedsala VIan de, yek ji wargehên leşgerî yên herî girîng ê împeratorê bîzansî Justinianus bûye.

Di serdema îslamiyetê de, bajar cara yekem ji aliyê kumandarên Xelîfe Omer Îyaz bin Ganem ve hatiye girtin. Di wê demê de bajar bi navê Meyafarqîn hatiye bi navkirin.

Paşê bajar ketiye destê hemdanî, biweyhî û merwaniyan.