1. Jin xwestin timî bi hêsanî naçe serî, hingê keçik tê revandin an jî keç û kur hevdû direvînin. Eger hatibe xwestin û nedabin, keçik bi dilê xwe reviya be ji aliyê civakê ve ev revandin xweş tê dîtin; mezin û rûsipî dikevin navberê, herdû aliyan li hevdû tînin. Ku revandin bê xwestin hatibe kirin, doz giran dibe. Eger bi darê zorê ev hatibe kirin ev heta neyartî, ji hev kuştin û mehkemeyan jî diçe. Keça ku bêdiliya bav û birayên xwe kiribe û pey yekî ketibe, pê re li hev bên jî êdî ew ji rûmetê dikeve, carna jî heta mirinê riya mala bavê lê tê heram kirin, bi saxî çavê wan bi hev nakeve.