5. (bnr: muhemmed seyyîdê ‘alem)
Muhammed seyyîdê ‘alem
Şefî’ê roja mîzanê
Çiraxê dîdeyê Adem
Xwedanê wehy û Furqanê
Xudanê wehy û tenzîlê
Bi eqlam û bi tebcîlê
Qelem da nesxê Încîlê
Nema Tewrat di xeclanê
Çi Încîl û çi Tewrat in
Di mensûx û di mulxat in
Bi wî navî musemmat in
Hukum çû kenzê Rehmanê
Bi Hukmê seyyîdê mursel
Nebiyyê axir û ewwel
Betal kir dînha mucmel
Bi ayat û bi Quranê
Bi ayat û bi tewhîdê
Ji teşrîfê û temcîdê
Şeva xurrem di tewlîdê
Senem hûr bûn di pûtxanê
Nigûnser bûn senem ‘aciz
Ji tewlîda gula qurmiz
Bi kesrayî geha mu’ciz
Tezelzul kefte eywanê
Bûye mizgîn di dinyayê
Şikufte werd û re’nayê
Ji baxê îstefeyna yê
Qureyşî eslî însanê
Qureyşî bû penahê dîn
Xudanê sûretê yasîn
Şivanê kudekê nûrîn
Melek hatin di fermanê
Melek hatin bi te’cîlî
Du şeq kir sîne Cibrîlî
Elem neşreh tê tenzîlî
Dikit tewzîh û tibyanê
Xudanê textê lewlake
Suwarê heft-i eflak e
Li ‘erşî merkeza xak e
Ji bo wî hate kêşanê
Ji bo wî çêbû ev ‘alem
Nebî bû hêj herî Adem
Di exbara wekû xatem
Çiraxê ehlê îmanê
Çiraxê ruhniya ummet
Ji bo wî çêbû ev xelqet
Fetahê dergehê cennet
Emîrê sedrê dîwanê
Emîrê textê ‘uqbayê
Sîha wî dara tûbayê
Xwezî carek di dinyayê
Bidîta min tu wî anê
Di wê anê û hînê bû
Dilim muştaqî dînê bû
Li dergahê Medînê bû
Resûlê Haşimî kanê
Resûlê Haşimî sabir
Ew e Taha ew e haşir
Dil û canê me bû agir
Ji nar û pêt û hîcranê?
Ji nar û pêtê da ser me
Evîna te qewî germ e
Du çavan pê bikim surme
Ji toza rewza astanê
Ji toza wê derazînê
Dikim feryad û nalînê
Xudê çêkit di wê hînê
Wisala lûtf û îhsanê
Wisala seyyîdê ehbab
Xudanê mînber û mîhrab
Muyesser bin li min esbab
Mi’can avête meydanê
Me can bada fîdayê te
Tenem xaka serayê te
Zeban weqfa senayê te
Dilê min ‘ebdî fermanê
Dilim qendîka rewzê bit
Lebim nêzîkî hewzê bit
Ji ehlê sidq û feyzê bit
Ez im muhtacê xufranê
Du ‘alem pêkve muhtacê
Ji bo wan hetî îxracê
Şeva ew çûye mî’racê
Çi xulxul kete eywanê
Çi xulxul hate ez xebra
Sedayê gunbeda xedra
Ke subhanellezî esra
Ji Qudsê çûye dîwanê
Ela ey seyyîdê sefwet
Tu roja heşr û pir fitnet
Bibêjit ummetî ummet
Fekende ser çûganê
Fekende ser biya derbey
Dikim hîvî ji mîrê heyy
Şefa’et kî ji bo batey
Bide ber zillê seywanê
Melayê Bateyî
|