9. rênas jiyan di paşgotina mexzena xwînê de dibêje:



''Zimanê çirûskîzmê, zimanê maran e ango jahrîn e, û ev jahr hûtê hundirê mirov ê metebolîzmaya wî dagir kiriye dikuje. Di qirna em tê de ne,kes,ji ber otorîte,sîstemên desthilatdar û alavên gemarî û genî xwe najî an jî hûtê hundirê wî ji dêvla wî/wê dijî û biryarên ku divê ew bidin, hût ji dêvla wî/wê didin, ew hût împaratorîya xwe di ruhê wî/wê de avakiriye, kesayeta ku dagir kiriye li gora dilê xwe bi rê ve dibe. Zimanê çirûskizmê yê marî û herweha yê jahrî bi pêvedanekê van hûtan dikuje û kesayeta orijîn ji nav lepên wan difilitîne. Çirûskîzm ne agir e, ne tofan û ne jî lehî ye, yanî ji wesfen mezin û bandora wan pir nehatiye pêk hatin, hew çirûskeke birûskê ye, di enerjiya çirûskeke birûskê de ye, di ronkaya çirûskeke birûskê de ye, qederê çend saniyan ronahiyekê çêdike û dû re her der dîsa vedigere tarîtiya xwe ya berê, di hundirê van saniyên ronî de, yên bixwazin dikarîn bi qasî tiştên têra despêkeke baş bikin bibînin, ger ew bixwazin dikarin ev çend saniyana firehtir û bilintir bikin, ger nexwazin wê dîsa di tariya xwe de bimînin. An jî di roniyê de çirûskeke reş e, yên bixwazin ji roniyê xelas bibin dikarin wê ji xwe re bikin mestere; ku nexwazin dikarin di nav roniya xwe de bijîn. Kesayeta çirûskist ne di taybetmendiyên mirov û ne jî di taybetmendiyên lawiran de ye, hebûneke bêzayend e; ne nêr, ne mê û ne jî neromê ye,tebayekî nuh e, ew cilebekî li ser rûyê erdê yê nuh e, ew tiştekî din e, tişt e, lê heta niha ne tiştên heyî ye.

Wek mînak; kevçî, gul, av, genim, Nietzsche, hesp, kêzik, pênûs, Rimbaud, kevir, giya, Sartre... Çawa ev mînak bi serê xwe celebek bin ew jî celebek ji hemû celebên din cuda ye, tiştek e, ne weke tiştên din, kesek e, ne weke kesên din. Navekî nuh, dirûvekî nuh, ruhekî nuh, pîvaneke nuh, rengekî nuh, nuhbiîneke nuh...

çirûskîzm, di bahra ruh de çirûskên li ser avan dibiriqîne ye, di çavên kul yên digirî de rondikên stêrkî yên gerdîinî ye, di destê sibê de teqîna tîrêjên tavê ye, di tariyê de reqsa biriqandina li ser şûrê helbestekê ye.''